വനം മന്ത്രി എ.കെ. ശശീന്ദ്രന് നേരെ കരിങ്കൊടി വീശി യൂത്ത് കോൺഗ്രസ് നേതാക്കൾ അറസ്റ്റിൽ

കാഞ്ഞങ്ങാട് : വെള്ളരിക്കുണ്ടിൽവനം മന്ത്രിമാന്ത്രി എ.കെ. ശശീന്ദ്രന് നേരെ കരിങ്കൊടി. യൂത്ത് കോൺഗ്രസ് പ്രവർത്തകർ ആണ് കരിങ്കൊടി കാണിച്ചത്. വെള്ളരിക്കുണ്ടിൽ ഇന്ന് വിവിധ പരിപാടികൾക്കെത്തിയ മന്ത്രിക്ക് നേരെയാണ് വെള്ളരിക്കുണ്ട് താലൂക്ക് ഓഫീസ് പരിസരത്ത്  യൂത്ത് കോൺഗ്രസ് കരിങ്കൊടി കാട്ടിയത്. ശക്തമായ പൊലീസ് സാന്നിധ്യത്തിലായിരുന്നു മന്ത്രിയെത്തിയത്. ഫോറസ്റ്റ് ഉദ്യോഗസ്ഥരുമെത്തിയിരുന്നു. ജില്ല ജനറൽ സെക്രട്ടറി മാർട്ടിൻ ജോർജ്, വെസ്റ്റ് എളേരി മണ്ഡലം യൂത്ത് കോൺഗ്രസ് പ്രസിഡന്റ് ജോബിൻ മണി, കാഞ്ഞങ്ങാട് നിയോജക മണ്ഡലം വൈസ് പ്രസിഡന്റ് രഞ്ജിത്ത് അരിങ്കല്ല് എന്നിവരാണ് അറസ്റ്റിലായത്. വെള്ളരിക്കുണ്ട് പൊലീസ് കേസെടുത്തു. വന്യജീവികൾ മലയോര മേഖലയിലെ കർഷകരുടെ ജീവനെടുക്കുകയും ക്യഷിയും ജീവിത സൗകര്യങ്ങളും നശിപ്പിക്കുകയും ചെയ്യുമ്പോൾ ഇടപെടാതെ പാട്ടും പാടി നടക്കുന്ന വനം വകുപ്പ് മന്ത്രിക്കെതിരെയുള്ള പ്രതിഷേധ മാണ് കരിങ്കൊടി കാട്ടിയതിലൂടെ പ്രകടമാക്കിയതെന്ന് യൂത്ത് കോൺഗ്രസ് നേതാക്കൾ പറഞ്ഞു.